0
வீதியில் கண் பதித்தேன்
சூன்யத்தில் நிலை கொண்டது மனது
கடந்த காலத்தில்
செய்த தவறுகள்
அகஸ்மாத்தாக நினைவுக்கு வந்தது
மேஜையில் புத்தகங்கள் கிடந்தன
கண்கள் வாசலை நோக்கியபடியே
இருந்தது
நாய் நரகலைத் தின்றோடியது
மரங்கள் அசைவற்று நின்றன
இளமையில் எத்தனை கோடி இன்பங்களோ
முதுமையில் அத்தனை துயரங்கள்
சுடலை சொல்லிவிட்டுச் சென்றான்
நான் இறக்கின்ற தேதியை
சங்கரன் மாயை என்றான்
புத்தன் ஆத்மா இல்லை என்றான்
சூரல் நாற்காலியில் சாய்ந்து
கண் மூடும் போது
கேள்விகள் அம்பென தைக்கின்றது
விருப்பப்பட்டா பிறக்க வைக்கின்றான்
பொம்மை போல் ஆட்டுவிக்கின்றானே
தான்தோன்றியாக பிறந்தவனுக்கு
பந்த பாசம் புரியுமா
வாழ்வின் விளிம்பில்
நின்று கொண்டு
கருடபுராணம் படித்துக் கொண்டிருக்கிறேன்
இல்லாமல் போவோம்
என்று தெரியும் போது
இருப்பது துயரத்தைத் தருகிறது
இடுகாட்டில் என் சவத்துக்கு
தீ மூடி பேயாட்டம் ஆடுவான்
சுடலை
பிச்சைக்காரன் என்றாலும்
பேரரசன் என்றாலும்
எவனையும் அவன் விடலை.
0
மோட்ச தேவதைகளுடன்
கடவுள் பேசிக்கொண்டிருந்தார்
தமது குமாரரர்கள் மீது
மிகுந்த நம்பிக்கை வைத்திருந்தார்
ஏதேன் தோட்டத்தில்
ஆதாமுக்கும், ஏவாளுக்கும்
எந்த கட்டுப்பாடும் விதிக்கவில்லை அவர்
ஒரேயொரு வேண்டுகோள் வைத்தார்
தோட்டத்திலொரு மரத்தில்
காய்க்கும் பழங்களை
புசிக்காதீர்கள் என்பது தான் அது
இருவருக்கும் மூன்று வேளை
உணவு கிடைக்கச்செய்தார்
தான் உருவாக்கப் போகும்
கடவுளர் பூமியைப் பற்றி
கனவு பல கொண்டிருந்தார்
மனுஷகுமாரரர்கள் சொர்க்கத்தில்
என்றென்றுமாய் நிலைத்திருப்பர்
என்று நினைத்திருந்தார்
காலன் கால் பதிக்காத இடம் இது
என்று பெருமிதம் கொண்டார்
கடவுளின் சந்தோஷம்
சில காலம் கூட நீடிக்கவில்லை
ஆதாம் அறிவுப்பழம் உண்டதால்
சுவர்க்கத்திலிருந்து வெளியேற்றப்பட்டான்
அந்த துன்பியல் சம்பவத்தை எண்ணி
சுவர்க்கத்தில் கடவுள் சிந்திய
கண்ணீர்த் துளி
பூமியில் மழையாகப் பெய்தது.
0
அதிகாலையில்
எழுந்திருக்க
வேண்டுமென்றுதான்
அலாரம் வைத்தேன்
மனம்
எழுந்து என்ன சாதிக்கப்
போகிறாம்
என்றது
கண் அசந்தேன்
விழித்த போது மணி ஆறு
முன்னமே எழுந்திருக்கலாமோ
என மனம் வருந்தியது
மனமே நொடிக்கு ஒரு தடவை
நிலை மாற்றி என்னை
அவஸ்தைபட வைப்பதில்
உனக்கு என்ன சுகமோ
இதோ கிளம்பியாச்சி
முதலில் கோவில்
பிறகு அலுவலகம்
எதிரில் ரகுவா
பேச்சிலேயே நாத்திகனாக
மாற்றி விடுவானே
சிறுநீர் கழிப்பது போல்
வேலி பக்கம் ஒதுங்கி
தப்பித்தேன்
இதே வேலையில்
ரொம்ப நாள்
குப்பை கொட்ட முடியும்
என்று தோன்றவில்லை
இளமை கொடுத்த சிறகை
முதுமை பறித்துவிட்டது
வியாதியின் கூடாரம் தானே
இந்த உடல்
மருந்தகத்திலும் கணக்கு
உண்டு
மளிகை கடையிலும் கணக்கு
உண்டு
உருப்படியா வேலை செய்ய
உடல் ஒத்துழைக்கவில்லை
ஒண்ணாம் தேதிக்காக
வேலை செய்வது
சுமையாக இருக்கிறது
சித்திரகுப்தன் எனது
கோப்புகளை
எடுத்துப்பார்த்தால்
சிரிப்பான்
இத்தனை சிலுவைகளை
இவன் ஒருவனே
சுமக்கிறானே என்று.
0
உங்களுக்குத் தெரியுமா
கண்களுக்குத் தெரியாமல்
வேறொரு உலகம் இங்கு
இயங்கி வருவதை
உலகை வெற்றி கொள்ள
அலைந்தவர்களெல்லாம்
விதியிடம் தோற்றதை
எல்லா புரட்சியிலும்
இறந்தவர்களின் எண்ணிக்கை
எவ்வளவு என்பதை
ஒரு நாட்டின்
இறையாண்மைக்காக
இரண்டரை லட்சம் பேர்
பலியானதை
வல்லரசாகும் பேராசையில்
பழங்குடியினர்
புறக்கணிக்கப்படுவதை
கன்னிமை தொலைத்த பெண்கள்
கண்ணகியாவதை
மேலை நாட்டு
மொழியின் ஆதிக்கத்தால்
தமிழ் மெல்ல மெல்ல
செத்துக் கொண்டிருப்பதை
வக்கற்ற ஜனங்கள்
ஓட்டுப் போடுவதோடு
தங்கள் ஜனநாயகக் கடமை
முடிந்துவிட்டதாக
எண்ணுவதை.
0
கண்ணை மூடிக்கொண்டால்
உலகம் இல்லாமல் போய்விடுமா
தூர் வாரப்படும் கிணற்றிலிருந்து
எடுக்கப்படும் பொருட்களைக் காண
உனக்கு ஆவலாய் இருக்காதா
புள்ளிகள் மட்டுமே
அழகிய கோலமாகிவிடுமா
வானம் எழுதும்
ஓவியக் கவிதை தானே
வானவில்
காற்று நிரப்பப்பட்ட
பலூன்களைக் கண்டால்
குழந்தைமை உடைந்து
வெளிவருவதில்லையா
கருணை இல்லங்களுக்கு
உதவிடும் போது
நமது இறைமை கொஞ்சமாவது
வெளிப்படுவதில்லையா
ஒரு குழந்தை வந்து
உன்னை அம்மா என்றழைத்தால்
உனக்கு கோபிக்கத் தோன்றுமா
மிக அரிதாகவே
ஜோக்குகள் சொல்கிறேன்
சிரிக்க மாட்டாயா.
உலகம் இல்லாமல் போய்விடுமா
தூர் வாரப்படும் கிணற்றிலிருந்து
எடுக்கப்படும் பொருட்களைக் காண
உனக்கு ஆவலாய் இருக்காதா
புள்ளிகள் மட்டுமே
அழகிய கோலமாகிவிடுமா
வானம் எழுதும்
ஓவியக் கவிதை தானே
வானவில்
காற்று நிரப்பப்பட்ட
பலூன்களைக் கண்டால்
குழந்தைமை உடைந்து
வெளிவருவதில்லையா
கருணை இல்லங்களுக்கு
உதவிடும் போது
நமது இறைமை கொஞ்சமாவது
வெளிப்படுவதில்லையா
ஒரு குழந்தை வந்து
உன்னை அம்மா என்றழைத்தால்
உனக்கு கோபிக்கத் தோன்றுமா
மிக அரிதாகவே
ஜோக்குகள் சொல்கிறேன்
சிரிக்க மாட்டாயா.
0
தடித்த வார்த்தைகளுக்கு
பிறகு பரிமாறப்பட்ட
தேநீர்
கசந்தது
கூண்டுப் புலியை
வெளியே திறந்துவிடுவது
போல்
தன் இணையை சாகடித்தவனை
அரவம் துரத்துவது போல்
கோபமும்,காமமும்
கூரிய வாளைப் போன்று
உறையில் தயாராய்
இருக்கிறது
ஆணவம் தான்
இன்னொருவரின் சிறகை
முறிக்கிறது
கோபத்தால்
குடுவையிலுள்ள அமிலம்
போன்று
இரத்தம் கொதிக்கிறது
காமம்
யாரை வலைக்குள்
வீழ்த்தலாமென்று
தன் பிளவுண்ட நாக்கை
வெளியே நீட்டிக்
கொண்டிருக்கும்
பணம் கொண்டு வந்தால் தான்
படுக்கையறையில் அனுமதி
என்று
மனைவி முகம் சுளிக்கும்
போது
பாரதம் பரத்தையர் தேசம்
ஆகிவிட்டதா
என்று தோன்றுகிறது
கோயில் கோபுரத்திலுள்ள
நிர்வாணச் சிலைகள்
என்னைப் போன்றவர்கள்
பார்த்து ரசிக்கத்தான்.
0
பிணவறையில் உறங்குகின்றன
தெய்வங்கள்
பூசைகளை ஏற்றுக் கொண்டு
நாட்களை ஓட்டி இருக்கலாம்
பிரார்த்தனைகளை செவிமடுக்காமல்
பாற்கடலில் பள்ளிகொண்டிருக்கலாம்
பக்தர்களின் பாலாபிஷேகத்தில்
உள்ளம் குளிர்ந்திருக்கலாம்
அடிமுடியைத் தேடியபடியே
சென்றிருந்தாலும் பிரச்சனையில்லை
அதிகாரமற்ற அலங்காரப் பதவியில்
வீதியுலா சென்றிருக்கலாம்
பாதாள அறை பொக்கிஷங்கள்
பறிபோய்விட்டதை எண்ணி
மனம் கலங்கியிருக்கலாம்
வரம் வாங்கி திரும்புபவர்களின்
வாகனங்கள் எப்படி
விபத்தில் சிக்குகின்றன
என்ற கேள்வி உதிக்காமல்
இருந்திருக்கலாம்
அவதாரங்கள் பக்கமே
தர்மம் இருந்ததாக
புத்தகங்களில் படித்திருக்கலாம்
விதி என்ற பெயரில்
மக்களின் வாழ்க்கையில்
விளையாடாமல் இருந்திருக்கலாம்
தான்தோன்றித் தனமாக
செயல்படாமல் இருந்திருந்தால்
சரண கோஷம் எழுப்ப
ஆட்கள் கிடைத்திருப்பார்கள்
மரணத்தை வைத்து
பூச்சாண்டி காட்டாமல்
இருந்திருந்தால்
எல்லா கடவுளர்களும்
தற்கொலை செய்து கொள்ள
வேண்டியிருந்திருக்காது
மரணத்தை ஒருவன்
வென்றால் கூட
கடவுளின் நிலை
கேள்விக்குறிதான்.
